کاوِلی

ش یویا لیزِ کُرِّ چَرداخ نِشینِ کاوِلی

سِزیا بختِ دتِ هوکاره شوینِ کاوِلی

گُرِّ آگرِ سیاست گِ اَژ افغان گیس یا*

همیشه بَرز و بِلیزه ای دَروینِ کاوِلی

ساج و سیرکو، ساز و سویر و سرمسی و سادگی

گالِ راو و سیرِ صحرا هفت سینِ کاوِلی

سِیر بِکه اَر جَرِّ تاوسون لَم وِسی و پا  پَتی

خاکه پوزی کِردِن و حوشه چِنینِ کاوِلی

واعظ گَشتَل شِنَفتِم گاله داسی بی اَنیش

حمله کِردی یِ مِجو اَر دل و دینِ کاوِلی

وِتِم آخر بی خَوَر، نایونِ پودَم بِرّیا

گِت بِکِرهی دَم و زونِت و هَچینِ کاوِلی

ایربِچِن اوسارِ یابو شَلِت ای خاکِ هنر

جَم بِکه تیر و کَمونِت ای کمینِ کاوِلی

چویچیا توِم دِرِّک و دسِ هُِوّلِ روزگار

بی وِهار و اور و وارون ای زمین کاوِلی

دس و دسمال، تال و تمَک، چوپی و کِل کِله ریز

مَشکِنی کِرکِ خُصه، دَسِ زوینِ کاوِلی

ژاری و درد و پژاره، تَم و توزِ روزگار

کُل خِراوه داسی اَر دِلِ خمینِ کاوِلی

اَر هُمارِ دشتِ شِعرم گرته چویچه پِیچیا

بی لَقوم قیقاژه مایجی اسب زینِ کاوِلی

چوی «کرم» نارینه ژَن و شیت و حیرون موین

اَر بِکیشی سَر و ناکُم ای سَرینِ کاوِلی

-------------------------------

*کولی ها را اصالتاً افغانی و اهل کابل می دانند که به دلیل سیاست نژاد پرستانه در قرن های دور از از زادگاه خود رانده شده و در کشورهای مجاور به گدایی و مطربی پرداختند. این قول شفاهی است و در جایی نخوانده ام(کرم دوستی)

منبع: گرفته شده از کتاب پژاره کرم دوستی صفحه 91