شعر طنز لکی
هم دنگِم هِیزگرتْ ِایْ شِرّی مالَ ی
اِیْ ساختمون اتاقل چالَ ی
اسماً ساختمون امابلایَ
سه چارک مطبخ دوگز قلایَ
مِنیش دلخوشَم ساختمون دیرم
مال ارا زنی خونمون دیرم
مال چه،هارای چالْ، چوار طرَف بَرزِی
دیوارَل وامیژ(۱)سربون پِردرزی
ای طور جزیره هار نومجا آوِی
حُشک اِمات،چوی لَش ،کشتی خِراوی
اِی دویرا مَری کُنا بِن هُوری(۲)
یا مَری آثار یی کُوینه قُورِی
اُطاقَل گُجَرچوی جعبه کرمیت
تیرُل کُل باریک چوی ساق سُریت(۳)
سردریا کَشیش نامیزونَسی
چو چَفتی سُتین نوم ایونَسِی
تاریخ اِحداث نادیاریی
پیرکردن سی پِشت یادِگاریه
بیس وچوار ساعَت پِروپِرواسِی
مَری گُپْ تنگ، بایِوَرجاسی
همیشه هواردِن(۴) وارو کارَسی
اور میتِن (۵)عادت وکاروبارُسی
تا اورِی ای پِشت گَرین بای او سَر
اِی اَرا تِکَه تَکه مِی او وَر
تِرَکَل کُلْ واز، پِشت چاله مَکِی
وژسُ(۶) وَتینی بی حالَ مَکی
تا یی نِم وارون وِری دَرنَچو
یی تِک آو اِی سویل(۷) وَهَدَر نَچو
تااَر نوم سَرم کُل بِرِشِنتی
اَر ظرف و لِحاف ولی بِپِشکِنتی
یَه اَرا یَه سه ،بیمارَم بِکی
اِپا تَپ کِردن(۸) بیزارِم بِکی
تا اُوری بوینم،اِی خوصه تِکَه
ای سُرتا ناخُن پامَ مای رِکَه(۹)
لرزه مَگِریم،رنگم زردا ماو
دِلِم ای عیال وزنی سَردا ماو
اَر بووَ وارون،هُودِیَر مِردِمه
تِکَه مال سِیه اَتْرَش(۱۰) بِردمه
حَضراتْ،اِی ماله بیچارَه کِردِم
لِحافْ،اَر پِشت مِل آواره کردم
پیا خوی بیم تِکه یول (۱۱)کِردْمی
تِکه هُوبدبخت،مینگَه(۱۲) چول کِردْمی
تکه مال هُو ،رنج بیوَر کِردمی
تکه هو،یی لاو،یی سربردمی
تکه عاقبت فراری کِردمی
تکه تا ریشی اِسبی کوه بِردمی
تکه هو بیمارزمین گیرکردمی
کُرِجالی بیم،تکه پیرکردمی
تکه دِیر عادت ای خِراوَسه
کردار ای مالِ بدنباوَه (۱۳)سه
اِی ماله وَدرد تکه معتاده
اَرتکه نَکِی حتماٌ برباده
باور کَه بی اُور،هَمْ ،تِک تَکَسی
اِی تَری دیوار، شَکه شَکه سی
تا اوری ار سر، هرسین ظاهربو
می چتر، اَروسط اطاق حاضربو
تا آیلَل اِی زور،تَکه تَرنووِن
اِی آوِ دُویلَه(۱۴) ،قدیم گَر نُوون
بیس وچوار ساعت جِل وجام تَرَه
سرو مِل وگوش و دَس و پام تَره
می چوار فصلِ سال،اَرنوک بُونْ بوم
می آماده باشِ آسمون بوم
من وبار گِلون(۱۵) می هر بِدویم
سفت یَک بِگریم،تاکه نَکویم
ارا سُری بون، می یُرخه(۱۶) بِنم
ای گِل ورِی تَرْ کُچِک اورچنم
یورخَه سر بونَل،آوِروی بِردمِ
کِیه هُواس(۱۷) کِردن،افتضاح کردمُ
می هر سال،صدساجِ ،صدنفربارِم
بیسْ دیگه و،صدجوم،چوی چَمَر(۱۸)بارِم
کتری وسینی،وپیاله حاضرکَم
نَردِنگ(۱۹) وفِرقون،وماله حاضِر کَم
تَپی خاک ،بی ریخ،پِرکیه بِکَم
اِی تَپَه پِرآو،اِی چِیه بِکَم
می بال اور کیشم ، تاریشی شونم
شاوالِم اوردَم،تاریشی رونم
بِچُکمِی(۲۰) هَرّی، تا گِری مِلِم
تُن تُن بُولامی،تا بوشِن زِلِم
بعدِ چَن روژ،اُجرَتِ کارگر حِساو کَم
تا مال بی نویرَویرو اَناو کَمْ(۲۱)
“حُجَتْ”دل بِکَن،اج ای مَنزِله
اج ای مِشتِ خاک شومِ بَد گِله
توضیحات برخی واژگان
۱-بادخور
۲-سوراخ دهنه غار
۳-ساق گندم
۴-خوردن
۵-مکیدن
۶-خودش را
۷-ناودان
۸-پای کوب کردن پشت بام
۹-به لرزه افتادن
۱۰-زهره ترک کردن
۱۱-آواره کردن
۱۲-خانه ومحل زندگی
۱۳-بد بنیاد
۱۴-دوده
۱۵-بام غلطان
۱۶-هَروَله(حرکتی بین دویدن وکندراه رفتن)
۱۷-قرض کردن
۱۸-عزاداری
۱۹-نردبان
۲۰-افتادن در داخل گِل
۲۱-بعداز چندروز اجرت کارگران را حساب کنم،تا این خانه بی رونق وخرابه را اندود کنم.
منبع: سایت لکنا
خیلی خو بی.هم خوش حال کردمی هم دل تنگ.شاعر هر بژین و خاک ایرون