درد دنیا
کرم دوستی(2)
چَن ساله دلی اِشکیا دیرِم
حالی لق و لوق، چویچیا دیرِم
روژ و شو ای دَس، تمنایِ دل
وَ گَردِ وِژِم ماجرا دیرِم
خیالِ سفر دویر و دِریژی
تا جِفتِ سیمرغ پاپیا دیرِم
هول حِفارات فلک گِرتِمه
سِخونَل اِی یَک هَنجیا دبرِم
اَژ چَمَل مِدوم زِق دارِم وَ شو
اَسری آر دامون وِرَلّا دیرِم
حکیم اَر حکیم لاره مَکیشِم
دردی اَژ دکتر ناپیا دیرِم
اَسر و خوین چوی جو سِرالیژه ماو
نارِک وَ خویناو فیسیا دیرِم
ای دِل توریا اَژ روزِگارِم
پِرّ گُملی خوین ماسیا دیرِم
خیالی کُت کُت، هَر گِردا نوی
وَ دَسِ زَمون، پِشکیا دیرِم
زیرّه گل اَر دشت، حیرونمه مَکی
دوپا وَ زنجیر آبَسیا دیرِم
سینه پِرّ اَژ بیت سوزِ وِهاره
حلقی اَژ خُصه تاسیا دیرِم
فِره گَپ و گُرّ گِلدار و شیرین
رازِ دویزه بار، جَرخه جم کَری
اَر نوکَ قلم آشاریا دیرِم
اَر شوگارِ سخت، تَریکه ظِلمات
فکری چوی چراخ، گیسیا دیرِم
«کرم» تا صدات بای اِی خیالِم
گوش اَر دنگِ کوگ سَرچیا دیرِم
------------------------------------------
برگرفته از کتاب شعر پژاره، صفحه 55
